தமிழகம் முதலிடம்

சென்னை: உயர் கல்வி கற்கும் மாணவியர் எண்ணிக்கையில், தமிழகம் முதலிடத்தில் உள்ளது, என, உயர்கல்வித் துறை அமைச்சர் அன்பழகன் தெரிவித்தார்.

சட்டசபையில், கேள்வி நேரத்தில் நடந்த விவாதம்:

தி.மு.க., - ஆண்டி அம்பலம்: நத்தம் தொகுதியில், அரசு கல்லுாரி எதுவும் இல்லை. எனவே, மாணவ,மாணவியர் உயர் கல்வி கற்க, 50 கி.மீ., துாரத்தில் உள்ள திண்டுக்கல் செல்ல வேண்டி உள்ளது. எனவே,அரசு மகளிர் கலைக் கல்லுாரி துவக்க அரசு முன்வருமா?

அமைச்சர் அன்பழகன்: திட்டம் எதுவும் இல்லை.

தமிழகத்தில், உயர் கல்வி கற்கும் பெண்கள் எண்ணிக்கையில், இந்திய அளவில் தமிழகம் முதலிடத்தில் உள்ளது.

இந்தியாவில் உயர் கல்வி கற்கும் பெண்கள் எண்ணிக்கை, 22.7 சதவீதமாக உள்ளது; தமிழகத்தில், 42.7சதவீதமாக உள்ளது.

தி.மு.க., - பூங்கோதை: ஆலங்குளம் தொகுதியில், அரசு கல்லுாரி துவக்க வேண்டும்; புதிய பாடப்பிரிவுகளை துவக்க வேண்டும்.

அமைச்சர் அன்பழகன்: கடந்த ஐந்து ஆண்டுகளில், 959 புதிய பாடப்பிரிவுகள் துவக்கப்பட்டுள்ளன.

தி.மு.க., - எழிலரசன்: மாவட்டத் தலைநகரமாக திகழும் காஞ்சிபுரத்தில், அரசு கலை மற்றும் அறிவியல் கல்லுாரி துவக்க வேண்டும்.

அ.தி.மு.க., - ராஜாகிருஷ்ணன்: பகர்கூர் மலைப்பகுதியில் உள்ள மாணவ, மாணவியர், உயர்கல்வி கற்க, 70 கி.மீ., துாரத்தில் உள்ள, ஈரோடு செல்ல வேண்டி உள்ளது. எனவே, அந்தியூரில் அரசு கலை மற்றும் அறிவியல் கல்லுாரி துவக்க வேண்டும்.அமைச்சர் அன்பழகன்: பரிசீலித்து, உரிய நடவடிக்கை எடுக்கப்படும். இவ்வாறு விவாதம் நடந்தது.